ផ្សាយពាណិជ្ជកម្ម
គេហទំព័រ WWW.KMSTVONLINE.COM ទីស្នាក់ការកណ្តាល : លេខ៤៨អឺ០ ភូមិ៣ ផ្លូវ៣៤៨ សង្កាត់បឹងកេងកង៣ ខណ្ឌបឹងកេងកង ភ្នំពេញ ទំនាក់ទំនង Tele: 012 880 593 >

ផ្សាយពាណិជ្ជកម្ម
គេហទំព័រ WWW.KMSTVONLINE.COM ទីស្នាក់ការកណ្តាល : លេខ៤៨អឺ០ ភូមិ៣ ផ្លូវ៣៤៨ សង្កាត់បឹងកេងកង៣ ខណ្ឌបឹងកេងកង ភ្នំពេញ ទំនាក់ទំនង Tele: 012 880 593 >

ព័ត៌មានប្រចាំថ្ងៃ


អភិបាលខេត្តកំពង់ធំ អញ្ជើញចុះពិនិត្យការលក់ដូររបស់បងប្អូនអាជីវករនៅផ្សារស្ទោង និងផ្សារស្ទោងអភិវឌ្ឍន៍ និងបន្ដចុះពិនិត្យមើលកន្លែងយកសំណាកបងប្អូននៅតំបន់ក្រហម ក្នុងភូមិស្ពានគ្រងនៃឃុំចំណាក្រោមស្រុកស្ទោង

កំពង់ធំ៖ នាព្រឹកថ្ងៃសៅរ៍ ទី៣១ ខែកក្កដា ឆ្នាំ២០២១ ឯកឧត្តម សុខ លូ អភិបាលខេត្តកំពង់ធំ អមដំណើរដោយអភិបាលរងខេត្ត ថ្នាក់ដឹកនាំមន្ទីរអង្គភាពជំនាញពាក់ព័ន្ធជុំវិញខេត្ត ព្រមទាំងសហការី បានអញ្ជើញចុះពិនិត្យមើលការលក់ដូររបស់បងប្អូនអាជីវករនៅផ្សារអភិវឌ្ឍន៍ស្ទោង និងផ្សារស្ទោង និងបន្ដចុះពិនិត្យមើលកន្លែងយកសំណាកបងប្អូននៅតំបន់ក្រហម (ភូមិស្ពានគ្រងនៃឃុំចំណាក្រោម) ស្រុកស្ទោង ខេត្តកំពង់ធំ ។

ឯកឧត្តម អភិបាលខេត្តកំពង់ធំ បានមានប្រសាសន៍លើកឡើងថា ដោយសារក្រុមការងារ និងគណៈកម្មការផ្សារ បានពិនិត្យឃើញថា នៅផ្សារអភិវឌ្ឍន៍ស្ទោងបានត្រូវរៀបចំសណ្តាប់ធ្នាប់ផ្សារជូនដល់បងប្អូនអាជីវករក្នុងការលក់ដូរ ប្រកបដោយរបៀបរៀបរយល្អ និងមានសោភ័ណភាពល្អ ។

ជាមួយនោះដែរ ឯកឧត្តមអភិបាលខេត្ត ក៏បានអំពាវនាវដល់បងប្អូនអាជីវករការលក់ដូរអនាធិបតេយ្យ មួយចំនួនដែលគ្មានសណ្តាប់ធ្នាប់នៅក្នុងផ្សារស្ទោង ត្រូវធ្វើការកែប្រែជាបន្ទាន់ដោយមិនត្រូវលក់ដូរលើចំណីថ្នល់ និងផ្លូវថ្នល់សាធារណៈឡើយ ។ ក្រៅពីបញ្ហាដែលបានលើកឡើងខាងលើ ឯកឧត្តមអភិបាលខេត្ត ក៏បានជំរុញឱ្យអាជ្ញាធរខណ្ឌទាំងអស់ត្រូវចុះពិនិត្យស្ថានភាពនៅក្នុងផ្សារស្ទោងជាប្រចាំ ហើយត្រូវយកចិត្តទុកដាក់ឱ្យបានខ្ពស់បំផុត ជុំវិញវិធានការការពារដោយត្រូវផ្សព្វផ្សាយនិងជំរុញឱ្យបងប្អូនប្រជាពលរដ្ឋអាជីវករអនុវត្តវិធានរបស់ក្រសួងសុខាភិបាលឲ្យបានជាប់ជានិច្ចដើម្បីការពារកុំអោយមានការឆ្លងរាលដាលនៃជំងឺកូវីដ១៩។

ក្នុងថ្ងៃដដែលនោះដែរ ឯកឧត្តមអភិបាលខេត្ត បានអញ្ជើញបន្តដំណើរចុះពិនិត្យមើលកន្លែងយកសំណាកបងប្អូននៅ“តំបន់ក្រហម”ក្នុងភូមិសាស្រ្ដ ភូមិស្ពានគ្រង នៃឃុំចំណាក្រោម ស្រុកស្ទោង ខេត្តកំពង់ធំផងដែរ ។ ទន្ទឹមគ្នានោះក្រុមគ្រូពេទ្យ បានបញ្ជាក់ថា បានរកឃើញអ្នកវិជ្ជមាន កូវិដ ១៩ ចំនួន១៥នាក់ ក្នុងចំណោមអ្នកមកយកសំណាក ១៣៣ នាក់ ដោយការធ្វើតេស្តរហ័ស ។

ចុងក្រោយឯកឧត្តម សុខ លូ អភិបាលខេត្តកំពង់ធំ បានជំរុញឲ្យអាជ្ញាធរមូលដ្ឋានដែលស្ថិតនៅក្នុងតំបន់បិទខ្ទប់(តំបន់ក្រហម) ត្រូវអនុវត្តការងារលើកិច្ចការពារឲ្យបានហ្មត់ចត់បំផុត ដើម្បីបង្ការនិងទប់ស្កាត់ការរីករាលដាលជំងឺកូវី-១៩ ជាពិសេសឯកឧត្តមសូមអំពាវនាវអោយបងប្អូនដែលពាក់ព័ន្ធនឹងអ្នកវិជ្ជមានមកយកសំណាកទាំងអស់គ្នា ដើម្បីអាចឆាប់បិទបញ្ចប់ការឆ្លងនៅក្នុងភូមិសាស្រ្ដដែលបានបិទខ្ទប់នេះ ៕ ដោយ៖ មន្ទីរព័ត៌មានខេត្តកំពង់ធំ 

អភិបាលខេត្តកំពង់ចាម អញ្ជើញចុះពិនិត្យទីតាំងមួយចំនួន ដើម្បីត្រៀមរៀបចំជាបន្ទប់ចត្តាឡីស័ក និងបន្ទប់ព្យាបាលអ្នកជំងឹកូវីដ-១៩

 


 កំពង់ចាម: ថ្ងៃទី៣១ ខែកក្កដា ឆ្នាំ២០២១  ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ព្រមទាំងក្រុមការងារ និងអាជ្ញាធរក្រុង អញ្ជើញចុះពិនិត្យឃ្លាំងជាច្រើននៅក្នុងមន្ទីរពាណិជ្ជកម្មខេត្ត និងបណ្តាស្រុកមួយចំនួនទៀតក្នុងខេត្ត ដើម្បីត្រៀមរៀបចំជាបន្ទប់ធ្វើចត្តាឡីស័កឬបន្ទប់ព្យាបាលអ្នកជំងឹកូវីដ-១៩ ដែលកំពុងបន្តកើតមានឡើងនៅតាមសហគមន៍ នាព្រឹកថ្ងៃទី៣១ ខែកក្កដា ឆ្នាំ២០២១។

រូបថត៖ AKP-កំពង់ចាម


លោកជំទាវ យក់ សម្បត្តិ ៖ ក្រសួងធានាថានឹងមានវ៉ាក់សាំង ចាក់ជូនគ្រប់ជនគោលដៅទាំងអស់ នៅទូទាំងប្រទេស

 ភ្នំពេញ: ថ្ងៃទី៣១ ខែកក្កដា ឆ្នាំ២០២១ 

វ៉ាក់សាំងស៊ីណូវ៉ាក់ ចំនួន ០១លានដូសបន្ថែមទៀត ដែលកម្ពុជាបានបញ្ជាទិញពីប្រទេសចិន បានមកដល់កម្ពុជាហើយ នាព្រឹកថ្ងៃទី៣១ ខែកក្កដា ឆ្នាំ២០២១ នេះ ហើយវ៉ាក់សាំងជាច្រើនដូសទៀត នឹងមកដល់ជាបន្តបន្ទាប់ទៀតនៅខែសីហាខាងមុខនេះ ដែលស្របពេលនឹងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់កុមារ និងជំទង់ ដែលមានអាយុពី ១២ឆ្នាំ ដល់ ១៧ឆ្នាំ។ នេះបើតាមការឱ្យដឹងពីលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ក្នុងឱកាសទៅទទួលវ៉ាក់សាំងនៅព្រលានយន្តហោះអន្តរជាតិភ្នំពេញ។

លោកជំទាវ យក់ សម្បត្តិ បានបញ្ជាក់បន្ថែមថា ៖ “នៅថ្ងៃទី០១ ខែសីហា ស្អែកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាយើង នឹងអញ្ជើញជាអធិបតីក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់កុមារ និងជំទង់ ដែលមានអាយុពី ១២ឆ្នាំ ដល់ក្រោម ១៨ឆ្នាំ ដោយប្រើវ៉ាក់សាំងប្រភេទស៊ីណូវ៉ាក់នេះ ហើយយើងក៏បានត្រៀមវ៉ាក់សាំងវ៉ាក់សាំងស៊ីណូវ៉ាក់នេះរួចរាល់ហើយដែរ ដោយយើងមានវ៉ាក់សាំងគ្រប់គ្រាន់ក្នុងដៃ ហើយថែមនឹងការមកដល់ជាបន្តបន្ទាប់ទៀតនោះ គឺយើងមានវ៉ាក់សាំងមិនខ្វះទេ សម្រាប់យុទ្ធនាការចាក់វ៉ាក់សាំងនេះ ដោយយើងមានវ៉ាក់សាំងយុទ្ធសាស្រ្តតាមរយៈការបញ្ជាទិញ និងវ៉ាក់សាំងគាំទ្រតាមរយៈជំនួយ ហើយដែលគ្រោងនឹងទទួលបានវ៉ាក់សាំងសរុបជាង ២៦លានដូស ត្រឹមខែពាក់កណ្តាលខែសីហានេះ”។

ដោយឡែក ពាក់ព័ន្ធនឹងវ៉ាក់សាំង អាស្រ្តាហ្សេនេកា និងវ៉ាក់សាំង ចនសុនអែនចនសុន ដែលកម្ពុជាទទួលបានពីជំនួយរបស់ជប៉ុន និងអាមេរិក កន្លងទៅថ្មីៗនេះ ក្រសួងសុខាភិបាល មានផែនការរួចហើយទៅតាមផែនការចាក់វ៉ាក់សាំងរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ (គ.វ.ក១៩) ក្នុងក្របខណ្ឌទូទាំងប្រទេស ទៅតាមបណ្តាខេត្តដែលប្រឈមទាំង០៩ នៅតាមព្រំដែន។

លោកជំទាវ បានឱ្យដឹងផងដែរថា បន្ទាប់ពីចក្រភពអង់គ្លេសបានប្រកាសបរិច្ចាគវ៉ាក់សាំងកូវីដ-១៩ AstraZeneca ចំនួន ៤១៥ ០០០ដូស ដល់កម្ពុជាតាមរយៈកិច្ចព្រមព្រៀងទ្វេភាគី និងយន្តការ COVAX ដើម្បីដោះស្រាយបញ្ហាកូវីដ-១៩នោះ ក្រសួងទទួលបានព័ត៌មានចុងក្រោយថាវ៉ាក់សាំងនេះ នឹងមកដល់ក្នុងអំឡុង ថ្ងៃទី០៣ ឬថ្ងៃទី០៤ ខែសីហាខាងមុខនេះ។

ពាក់ព័ន្ធនឹងប្រភេទវ៉ាក់សាំង ឬក៏ប្រសិទ្ធភាពនៃវ៉ាក់សាំងវិញ លោកជំទាវ យក់ សម្បត្តិ បានបញ្ជាក់ថា គ្រប់វ៉ាក់សាំងទាំងអស់ សុទ្ធតែបានសិក្សាស្រាវជ្រាវដោយក្រុមអ្នកវិទ្យាសាស្រ្តរបស់ក្រុមហ៊ុនបានយ៉ាងល្អិតល្អន់ហើយ ដូច្នេះចំពោះចំណុចនេះគឺពុំមែនជាបញ្ហានោះទេ។ បញ្ហាគឺនៅត្រង់ថា បន្ទាប់ពីចាក់វ៉ាក់សាំងហើយ គឺយើងមានកងការពារមួយចំណែកប៉ុណ្ណោះ ហើយមួយចំណែកទៀត គឺការពារខ្លួនដោយអនុវត្តវិធានការ ០៣ការពារ និង០៣កុំ។

គិតត្រឹមថ្ងៃទី៣១ ខែកក្កដា ឆ្នាំ២០២១នេះ កម្ពុជាបានទទួលវ៉ាក់សាំងបង្ការជំងឺកូវីដ-១៩ ចំនួនប្រមាណ ១៨ ៨១១ ០០០ដូស រួចមកហើយ ក្នុងនោះ វ៉ាក់សាំងស៊ីណូវ៉ាក់ (Sinovac) ដែលបញ្ជាទិញពីប្រទេសចិន មានចំនួន ១១លាន៥សែនដូស វ៉ាក់សាំងស៊ីណូហ្វាម (Sinopharm) មានចំនួន ៦លាន២សែនដូស (៣លានដូសបញ្ជាទិញ) និងវ៉ាក់សាំងកូវីសែល (Covishield) ដែលទទួលបានអាជ្ញាបណ្ណផលិតដោយ អាស្រ្តាហ្សេនេកា (AstraZeneca) ដែលជាអំណោយអង្គការសុខភាពពិភពលោក តាមរយៈយន្តការកូវ៉ាក់ (Covax Facility) មានចំនួន ៣សែន២ម៉ឺន៤ពាន់ដូស និងជំនួយរបស់ជប៉ុន តាមរយៈយន្តការកូវ៉ាក់ (Covax Facility) ដូចគ្នា មានចំនួន ៣សែន៣ម៉ឺន២ពាន់ដូស (ក្នុងគម្រោង ១លានដូស) និងវ៉ាក់សាំង Johnson and Johnson ដែលជាជំនួយសហរដ្ឋអាមេរិកចំនួន ៤៥៥ ០០០ដូស៕

ដោយ ផែន រតនៈ

សាខាកាកបាទក្រហមកម្ពុជាខេត្តព្រះសីហនុ នាំយកអំណោយចែកជូនប្រជាពលរដ្ឋរងគ្រោះធ្វើចក្តាឡីស័ក នៅក្រុងព្រះសីហនុចំនួន ៥៨គ្រួសារ

ព្រះសីហនុ: ថ្ងៃទី៣០ ខែកក្កដា ឆ្នាំ២០២១ លោក គាំ សុខុម នាយកសាខាកាកបាទក្រហមកម្ពុជាខេត្តព្រះសីហនុបានដឹកនាំមន្ត្រីសាខា អនុសាខា អ្នកស្ម័គ្រចិត្តសាខា និងលោកស្រីអភិបាលរងក្រុងព្រះសីហនុ ចុះសួរ សុខទុក្ខនាំយកអំណោយមនុស្សធម៌របស់សាខាកាកបាទក្រហមខេត្តព្រះសីហនុ

 ចែកជូន បងប្អូនប្រជាពលរដ្ឋនៅតាមខ្នងផ្ទះ ដែលធ្វើចក្តាឡីស័កពាក់ព័ន្ធព្រឹត្តការណ៍សហគមន៍ ២០កុម្ភៈ ចំនួន ៥៨គ្រួសារ ក្នុងនោះប្រជាពលរដ្ឋរស់នៅសង្កាត់លេខ៤ ចំនួន ៤១គ្រួសារ សង្កាត់លេខ១ ចំនួន ១៤គ្រួសារ និងសង្កាត់ លេខ២ ចំនួន ៣គ្រួសារ ក្នុងក្រុងព្រះសីហនុ។ ការចុះសួរសុខទុក្ខ និងនាំយកអំណោយនេះ បានធ្វើឡើង កាលពីថ្ងៃព្រហស្បតិ៍ ៥រោជ ខែទុតិយាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៩ ខែកក្កដា ឆ្នាំ២០២១ ។

 លោក គាំ សុខុម បានធ្វើការពាំនាំនូវការសាកសួរសុខទុក្ខពីឯកឧត្តម គួច ចំរើន អភិបាលខេត្តព្រះសីហនុ និងជាប្រធានគណៈកម្មាធិការសាខាកាកបាទក្រហមខេត្តព្រះសីហនុ ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជូនចំពោះបងប្អូនប្រជាពលរដ្ឋដែលខ្វះខាតស្បៀង ខណៈជាប់ធ្វើចក្តាឡីស័ក។


លោកបានណែនាំ និងធ្វើការអប់រំផ្សព្វផ្សាយពីហានិភ័យនៃការឆ្លងរាលដាលនៃជំងឺ កូវីដ-១៩ ក្នុងសហគមន៍ ប្រសិនបើយើងទាំងអស់គ្នាមិនបានចូលរួមសហការអនុវត្តន៍នូវវិធានការរបស់ក្រសួងសុខាភិបាលឱ្យបានត្រឹមត្រូវ និងការណែនាំ ៣.កុំ និង ៣.ការពារ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីធានាថាខ្លួនយើង ក្រុមគ្រួសារយើងមិនមានការឆ្លងជំងឺកូវីដ- ១៩។

ទន្ទឹមនេះ ត្រូវចូលរួមអនុវត្តន៍ ពីវិធីកាត់បន្ថយហានិភ័យនៃការឆ្លងរាលដាលជំងឺកូវីដ-១៩ ដោយលើកកម្ពស់ការផ្លាស់ប្តូរទម្លាប់ការរស់នៅដោយធ្វើអនាម័យជាប់ជាប្រចាំ និងលាងសម្ងាតដៃឱ្យបានញឹកញាប់ជាមួយសាប៊ូ អាល់កុល ឬជែល ត្រូវពាក់ម៉ាស ឬក្រមាឱ្យបានជាប់ជានិច្ច ពិសេសវិធានការណ៍រក្សាគម្លាតសុវត្ថិភាព និងគម្លាតសង្គមឱ្យបានត្រឹមត្រូវ ដើម្បីធ្វើការកាត់ផ្តាច់ប្រភពចម្លងជំងឺកូវីដ-១៩ ក្នុងសហគមន៍យើងទាំងអស់គ្នា។

លោកនាយកសាខាក៏បានលើកឡើងដែរថា ស្ថិតក្នុងស្ថានភាពបច្ចុប្បន្ននេះ យើងត្រូវរស់នៅតាមបែបគន្លងថ្មីក្នុងការចូលរួមបង្ការ ទប់ស្កាត់ការឆ្លងរាលដាលជំងឺកូវីដ-១៩ ក្នុងក្រុមគ្រួសារ និងសហគមន៍ ។ សូមបញ្ជាក់ថា អំណោយដែលសាខាកាក បាទក្រហមកម្ពុជា ខេត្តចែកជូនប្រជាពលរដ្ឋដែលធ្វើចក្តាឡីស័កក្នុងក្រុងព្រះសីហនុចំនួន ៥៨គ្រួសារ ដោយក្នុងមួយគ្រួសារ ទទួលបានអង្ករ ២៥គីឡូក្រាម ត្រីខ ១០កំប៉ុង មី ១កេស ទឹកត្រី ១យួរ ទឹកសុទ្ធ ១កេស ប្រេងឆា ១ដប និងម៉ាស ១ប្រអប់ ៕

ដោយ ងូ សុមុនី, សម្រួលផ្សាយ៖ ដារ៉ា

កិច្ចប្រជុំស្តីពីវឌ្ឍនភាពការងារដើម្បីត្រៀមរៀបចំសន្និសីទលើកទី៨ នៃគណៈកម្មការកិច្ចការបរទេសនៃសភាកម្ពុជា-ឡាវ-វៀតណាម (CLV)

 


 ភ្នំពេញ: ថ្ងៃទី ២៩ ខែកក្កដា ឆ្នាំ ២០២១ ឯកឧត្តម ប៉ាន សូរស័ក្តិ រដ្ឋមន្រ្តីពាណិជ្ជកម្ម និងជាប្រធានគណៈកម្មាធិការសម្របសម្រួលការងារសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម បានដឹកនាំគណៈប្រតិភូអន្តរក្រសួងចូលរួមកិច្ចប្រជុំតាម    រយៈប្រព័ន្ធវីដេអូ កាលពី ថ្ងៃ៤រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃពុធ ទី២៨ ខែកក្កដា ឆ្នាំ២០២១ ដោយ មាន ការអញ្ជើញចូលរួម ពីឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌ មាន នៃរដ្ឋសភា និងលោកជំទាវ មាន សំអាន ប្រធានក្រុមសមាជិកព្រឹទ្ធសភាទទួលបន្ទុកកិច្ចសហប្រតិបត្ដិការជាមួយអន្ដរសភា កម្ពុជា-ឡាវ-វៀតណាម សមាជិក សមាជិកា នៃរដ្ឋសភា និងព្រឹទ្ធសភាផងដែរ។

នៅក្នុង ឱកាសនោះ ឯកឧត្តម ឈាង វុន ប្រធានអង្គប្រជុំ បានមាន ប្រសាសន៍អំពីកិច្ចសហប្រតិបត្តិការរវាងសភា CLV ដែលរៀបចំក្នុងរយៈពេល២ឆ្នាំម្តង និងតួនាទីដ៏សំខាន់របស់អង្គនីតិប្បញ្ញត្តិ ក្នុងការគាំទ្រអង្គនីតិប្រតិបត្តិ ដើម្បីជំរុញការអភិវឌ្ឍតំបន់ត្រីកោណតាមរយៈការពង្រឹងកិច្ចសហប្រតិបត្តិការរវាងសភា និងរដ្ឋាភិបាល ព្រមទាំង បានកោតសរសើរក្រសួងពាណិជ្ជកម្ម ដែលបានខិតខំយកចិត្តទុកដាក់សម្របសម្រួលការងារក្នុងក្របខ័ណ្ឌ CLV រហូតមក ដែលបានរួមចំណែកធ្វើឱ្យតំបន់អភិវឌ្ឍន៍ CLV កាន់តែរីកចម្រើនបន្ថែមទៀត។

ទន្ទឹមនឹងនេះ ឯកឧត្តម រដ្ឋមន្ត្រី បាន គូសបញ្ជាក់អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលបានធ្វើឱ្យបណ្តាខេត្តក្នុងតំបន់ត្រីកោណអភិវឌ្ឍន៍របស់កម្ពុជា ប្រែក្លាយមុខមាត់ថ្មីជាបន្តបន្ទាប់ ។ ក្នុងនោះរួមមានការកសាងហេដ្ឋារចនាសម្ព័ន្ធខ្វាត់ខ្វែង ការកៀរគរវិនិយោគក្នុងនិងក្រៅប្រទេស ការបង្កើតឱកាសការងារ និងលើកកម្ពស់ជីវភាពប្រជាពលរដ្ឋកាន់តែមានភាពល្អប្រសើរឡើង ពីមួយថ្ងៃទៅមួយថ្ងៃ ដែលបានរួមចំណែកយ៉ាងសំខាន់ក្នុងការកាត់បន្ថយភាពក្រីក្រជូនប្រជាពលរដ្ឋ។

ជាមួយគ្នានេះដែរ ឯកឧត្តមរដ្ឋមន្រ្តីបាន មាន ប្រសាសន៍ថា ក្រសួងពាណិជ្ជកម្មបានខិតខំប្រឹងប្រែងយ៉ាងខ្លាំង ក្នុងការសហការជាមួយក្រសួង/ស្ថាប័នពាក់ព័ន្ធនៅថ្នាក់ជាតិ និងថ្នាក់ខេត្តនៃប្រទេសទាំងបី ដើម្បីអនុវត្តន៍កិច្ចព្រមព្រៀង/ការសម្រេចរបស់ប្រមុខដឹកនាំ CLV ឱ្យទៅជាសកម្មភាពជាក់ស្តែង និង បានជម្រាបជូនអង្គប្រជុំអំពីចំណុចសំខាន់ៗ ដែលប្រទេសទាំងបីត្រូវខិតខំអនុវត្តន៍ រួមមាន៖ ផែនការអភិវឌ្ឍន៍វិស័យទេសចរណ៍សម្រាប់ CLV DTA ដើម្បីប្រែក្លាយតំបន់ព្រំដែនទៅជាតំបន់អេកូទេសចរណ៍ និងទប់ស្កាត់ការបំផ្លាញបរិស្ថាន ដែលជាអាយុជីវិតរបស់យើងនៅអនាគត ផែនការអភិវឌ្ឍន៍ឧស្សាហកម្មកៅស៊ូ CLV DTA ដោយខិតខំបង្កើតរោងចក្រកែច្នៃកៅស៊ូ និងពង្រឹងគុណភាពកៅស៊ូសម្រាប់លក់ចេញទៅទីផ្សារធំៗ ការពង្រឹងកិច្ចសហប្រតិបត្តិការក្នុងវិស័យសុខភាពសាធារណៈ និងសមត្ថភាពបុគ្គលិកសុខាភិបាល ក៏ដូចជាការបង្កើតសាលាពហុជំនាញជូនយុវជន ដើម្បីពួកគេអាចស្នងការអភិវឌ្ឍ និងបន្តកេរមរតកសាមគ្គីភាព និងកិច្ចសហប្រតិបត្តិការជាបងប្អូននៅក្នុងតំបន់។

ឯកឧត្តមរដ្ឋមន្រ្តីបានធ្វើការ បកស្រាយយ៉ាងក្បោះក្បាយជូនអង្គប្រជុំ អំពីការកែសម្រួលផែនការមេសម្រាប់ការអភិវឌ្ឍសេដ្ឋកិច្ច-សង្គមកិច្ច ក្នុង CLV DTA ដល់ឆ្នាំ២០៣០ ដោយបញ្ចូលការអភិវឌ្ឍ តាមរបបជីវភាពថ្មីក្រោយសម័យកូវីដ (New Normal) តាមរយៈការធ្វើពាណិជ្ជកម្មតាមព្រំដែន និងប្រក្រតីភាពនៃសង្គមនិងសេដ្ឋកិច្ចរបស់យើង ក៏ដូចជាផែនការ និងគម្រោងជាក់លាក់ដើម្បីអនុវត្តន៍ផែនការសកម្មភាព សម្រាប់ការតភ្ជាប់សេដ្ឋកិច្ច CLV រហូតដល់ឆ្នាំ២០៣០ ។ ដោយផ្តោតសំខាន់លើការធ្វើពាណិជ្ជកម្មតាមប្រព័ន្ធឌីជីថល ដើម្បីជំរុញការអភិវឌ្ឍសេដ្ឋកិច្ច និងលើកកម្ពស់ជីវភាពប្រជាពលរដ្ឋនៅតាមបណ្តាខេត្ត CLV។

សូមបញ្ជាក់ថា អង្គប្រជុំបានពិនិត្យ និងពិភាក្សាលើវឌ្ឍនភាពការងារនៃកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម ដើម្បីត្រៀមរៀបចំសន្និសីទលើកទី៨ នៃគណៈកម្មការកិច្ចការបរទេសនៃសភាកម្ពុជា-ឡាវ-វៀតណាម ដែលកម្ពុជានឹងធ្វើជាម្ចាស់ផ្ទះនាពេលខាងមុខ ឱ្យទទួលបានជោគជ័យ៕

 (ប្រភព៖ ក្រសួង ពាណិជ្ជកម្ម) សម្រួលផ្សាយ៖ ខ្មែម្ចាស់ស្រុក

រដ្ឋបាលខេត្តកំពង់ចាម នាំយកអំណោយចែកជូនប្រជាពលរដ្ឋ ដែលមានជីវភាព ខ្វះខាត នៅស្រុកកំពង់សៀម

 កំពង់ចាម: ថ្ងៃទី២៨ ខែកក្កដា ឆ្នាំ២០២១ លោកស្រី ប៉ាង ដានី អភិបាលរង តំណាងឯកឧត្ដម អ៊ុន ចាន់ដា អភិបាល នៃគណៈអភិបាលខេត្តកំពង់ចាម អញ្ជើញនាំយកអំណោយរបស់រដ្ឋបាលខេត្ត ចែកជូនបងប្អូនប្រជាពលរដ្ឋដែលមានជីវភាពខ្វះខាតចំនួន ២៤០គ្រួសារ នៅឃុំអំពិល ស្រុកកំពង់សៀម ខេត្តកំពង់ចាម នាថ្ងៃទី២៧ ខែកក្កដា ឆ្នាំ២០២១។

រូបថត៖ AKP-កំពង់ចាម:សម្រួលកាផ្សាយ:ខ្មែរម្ចាស់ស្រុក


រដ្ឋមន្រ្តីក្រសួងមហាផ្ទៃបង្ហាញលទ្ធផលការងារប្រយុទ្ធប្រឆាំងអំពើជួញដូរមនុស្ស និងអំពើធ្វើអាជីវកម្មផ្លូវភេទ ដែលគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស សម្រេចបានក្នុងរយៈពេល៦ខែ ឆ្នាំ២០២១

 


ភ្នំពេញ: ថ្ងៃទី២៧ ខែកក្កដា ឆ្នាំ២០២១ នៅថ្ងៃថ្ងៃ២រោច ខែទុតិយា សាឍ ឆ្នាំឆ្លូវ ត្រីស័ក ព.ស.២៥៦៥ត្រូវនឹងថ្ងៃចន្ទ ទី២៦ ខែកក្កដា ឆ្នាំ២០២១ សម្តេចក្រឡាហោម ស ខេង ឧបនាយក រដ្ឋមន្រ្តី រដ្ឋមន្រ្តីក្រសួងមហាផ្ទៃ បានបង្ហាញលទ្ធផលការងារប្រយុទ្ធប្រឆាំងអំពើជួញដូរមនុស្ស និងអំពើធ្វើអាជីវកម្មផ្លូវភេទ ដែលគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ.) សម្រេចបានក្នុងរយៈពេល៦ខែឆ្នាំ២០២១នេះ។

លើផេកផ្លូវការរបស់សម្តេចក្រឡាហោម បានគូសបញ្ជាក់ថា ចាប់ពីខែមករា ដល់ខែមិថុនា ឆ្នាំ២០២១នេះ អគ្គលេខាធិការដ្ឋាន គ.ជ.ប.ជ. បានប្រមូលទិន្នន័យជាប្រចាំរបស់រដ្ឋបាលរាជធានី ខេត្ត នូវចំនួនពលករវិលត្រឡប់ជារៀងរាល់ថ្ងៃ ក្នុងអំឡុងពេលនៃការរីករាលដាលជំងឺកូវីដ-១៩ សរុបប្រមាណ ៦៣.២៦៩នាក់ មានស្រ្តីប្រមាណ ២៧.១៦២នាក់។ ជាមួយគ្នានេះដែរ អគ្គស្នងការដ្ឋាននគរបាលជាតិ បានធ្វើបច្ចុប្បន្នភាពទិន្នន័យប្រចាំខែ ចំពោះពលករចំណាកស្រុក ត្រឡប់មកពីក្រៅប្រទេសវិញ ទាំងស្របច្បាប់ និងមិនស្របច្បាប់ សរុបចំនួន ១៥០. ៨៨៥នាក់ ដែលក្នុងនោះមានស្ត្រី ៥៤.៥៥៦នាក់ និង អនីតិជន៥៦៤នាក់ ស្រី១៥៧នាក់។

ក្នុងនោះកម្លាំងជំនាញ នៃស្នងការដ្ឋាននគរបាលខេត្តចំនួន៦ បានធ្វើការងារបង្ការទប់ស្កាត់ពលរដ្ឋខ្មែរ ដែលធ្វើចំណាកស្រុកទៅរកការងារធ្វើនៅក្រៅប្រទេសដោយខុសច្បាប់ បានចំនួន ៨២លើក មនុស្សចំនួន៥៩៣នាក់ ស្ត្រី១៩៧នាក់ ជាអនីតិជន ៣៤នាក់ ស្រី ០៧នាក់។ ក្នុងនោះមាន ខេត្តបាត់ដំបងចំនួន៣០លើក ខេត្តកោះកុងចំនួន២៧លើក ខេត្តបន្ទាយមានជ័យ ចំនួន៨លើក ខេត្តតាកែវ ចំនួន៩លើក និងខេត្តស្វាយរៀង ចំនួន៥លើក។ ក្រោយពីបានទទួល និងឃាត់ខ្លួនពលរដ្ឋទាំងនោះ ក៏បានធ្វើកិច្ចសន្យាអប់រំ ណែនាំកុំឱ្យចំណាកស្រុកខុសច្បាប់ទៅក្រៅប្រទេសទៀត។

សម្តេចក្រឡាហោម បានបញ្ជាក់ថា នៅក្នុងរយៈពេលមួយឆមាសនេះ ស្នងការដ្ឋាននគរបាលរាជធានី-ខេត្ត បានល្បាតឃ្លាំមើលគោលដៅ សង្ស័យមានសកម្មភាពអាជីវកម្មផ្លូវភេទ បានចំនួន ១.០៧៤លើក លើគោលដៅ៣១៨គោលដៅ មានចំនួនមនុស្សសរុបចំនួន១.២៤៩នាក់ ក្នុងនោះមានស្រ្តី ១.០៣៦នាក់ និងបានធ្វើសកម្មភាពបង្ការ ទប់ស្កាត់អំពើជួញដូរមនុស្ស និងអំពើធ្វើអាជីវកម្មផ្លូវភេទ តាមគោលដៅបម្រើសេវាកម្សាន្ត ដែលអាចបង្កប់សេវាផ្លូវភេទ ដោយចុះធ្វើបច្ចុប្បន្នភាពទិន្នន័យស្ថិតិ និងធ្វើកិច្ចសន្យាហាមឃាត់ ការប្រព្រឹត្តបទល្មើសសញ្ចារកម្ម និងផ្សព្វផ្សាយច្បាប់ស្ដីពី ការបង្រ្កាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ដល់ម្ចាស់អាជីវកម្ម និងបុគ្គលិកធ្វើការក្នុងហាងម៉ាស្សា និងខារ៉ាអូខេ។

ដោយឡែកនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការ ដ្ឋាននគរបាលជាតិ គឺក្រុមការងារអនុវត្តន៍ច្បាប់ នៃច្រកចេញ-ចូលតែមួយ ទទួលបន្ទុកការងារអាពាហ៍ពិពាហ៍រវាងពលរដ្ឋខ្មែរ និងជនបរទេស បានទទួលពាក្យ និងសម្ភាសន៍ពលរដ្ឋខ្មែរ និងជនបរទេស សរុបចំនួន ២១១គូ ដែលបានដាក់ពាក្យសុំរៀបអាពាហ៍ពិពាហ៍តាមផ្លូវច្បាប់ ព្រមទាំងបានទំនាក់ទំនងទៅនារីខ្មែរ ដែលទៅរស់នៅជាមួយស្វាមីនៅក្រៅប្រទេស ក្នុងនោះសាធារណរដ្ឋកូរ៉េ ១៣នាក់ ដើម្បីតាមដានស្ថានភាព ដែលសង្ស័យថាអាចកើតមានការជួញដូរមនុស្ស តាមរយៈការរៀបអាពាហ៍ពិពាហ៍។

ក្នុងនាមរាជរដ្ឋាភិបាលកម្ពុជា ក្នុងនាមក្រសួងមហាផ្ទៃ និងក្នុងនាមគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ.) សម្តេចក្រឡាហោម បានវាយតម្លៃខ្ពស់ និងកោតសរសើរចំពោះថ្នាក់ដឹកនាំ មន្រ្តីរាជការ គ្រប់ក្រសួងស្ថាប័នថ្នាក់ជាតិ និងថ្នាក់ក្រោមជាតិ ចំណុះឱ្យ គ.ជ.ប.ជ ទាំងអស់ ដែលបានខិតខំប្រឹងប្រែងបំពេញភារកិច្ច ដោយមិនខ្លាចនឿយហត់ ពិសេសនៅក្នុងអំឡុងពេល នៃការរីករាលដាលជំងឺកូវីដ-១៩ ដ៏គ្រោះថ្នាក់ទាំងនៅក្នុងប្រទេសកម្ពុជា និងនៅក្រៅប្រទេស ធ្វើឱ្យរាជរដ្ឋាភិបាលកម្ពុជាអាចសម្រេចបាននូវភារកិច្ចបម្រើជាតិ និងប្រជាជន លើការងារប្រយុទ្ធប្រឆាំងអំពើជួញដូរមនុស្ស។

ជាមួយគ្នា សម្តេចក្រឡាហោម ក៏សូមអំពាវនាវបងប្អនជនរួមជាតិ បន្តចូលរួមសហការជាមួយអាជ្ញាធរ និងមន្រ្តីពាក់ព័ន្ធទាំងអស់ នៅក្នុងការងារប្រយុទ្ធប្រឆាំងអំពើជួញដូរមនុស្សនេះនៅតាមមូលដ្ឋានរបស់បងប្អូន តាមរយៈការមិនប្រព្រឹត្តអំពើល្មើស ការរាយការណ៍អំពីអំពើល្មើស និងការចូលរួមផ្សព្វផ្សាយ ពន្យល់ អប់រំណែនាំដល់សាច់ញាតិ បងប្អូន អ្នកភូមិផងឱ្យមានការយល់ដឹងពីគ្រោះថ្នាក់នៃអំពើជួញដូរមនុស្ស ដែលស្ដែងឡើងតាមរយៈអាពាហ៍ពិពាហ៍មិនស្របច្បាប់ទៅក្រៅប្រទេស ការធ្វើចំណាកស្រុកខុសច្បាប់ និងការប្រើឧបាយកលទុច្ចរិតអូសទាញ ឃោសនា ក្រោមរូបភាពផ្សេងទៀតរបស់ជនល្មើស ៕


សមាគមចលនាយុវជនកម្ពុជា ១៥៧ សាខាខេត្តសៀមរាប ផ្តល់អំណោយជាសម្ភារ: គ្រឿងឧបភោគបរិភោគ និងថវិកា ដល់រដ្ឋបាលស្រុកស្រីស្នំ និងប្រជាពលរដ្ឋក្រីក្រ ចំនួន ៨គ្រួសារ ក្នុងស្រុកនេះ !

សៀមរាប៖ កាលពីថ្ងៃទី២៥ ខែកក្កដា ឆ្នាំ២០២១ ម្សិលម៉ិញ លោក ទេព ពិទូរ្យ ប្រធានសមាគមចលនាយុវជនកម្ពុជា ១៥៧ សាខាខេត្តសៀមរាប បានដឹកនាំសមាជិក សមាជិកា និងសប្បុរសជន សហការជាមួយរដ្ឋបាលស្រុកស្រីស្នំ និងក្រុមការងារសហភាពសហព័ន្ធយុវជនកម្ពុជាស្រុក នាំយកអំណោយជាសំភារ:ប្រើប្រាស់សម្រាប់យុទ្ធនាការប្រយុទ្ធប្រឆាំងជំងឺកូវីដ-១៩ និងគ្រឿងឧបភោគបរិភោគ និងថវិកា ឧបត្ថម្ភដល់រដ្ឋបាលស្រុកស្រីស្នំ ខេត្តសៀមរាប និងផ្តល់អំណោយ ជូនដល់គ្រួសារក្រីក្រចំនួន ៨គ្រួសារ នៅឃុំជ្រោយនាងងួន និងឃុំក្លាំងហាយ។ អំណោយដែលត្រូវប្រគល់ជូនរដ្ឋបាលបាលស្រុករួមមាន: អាកុលចំនួន ១០លីត្រ, ម៉ាស់ចំនួន ១០ប្រអប់, ទឹកបរិសុទ្ធវីតាល់ចំនួន ៥កេស និងមីចំនួន ៥កេស។ សម្រាប់អំណោយជូនដល់គ្រួសារក្រីក្រចំនួន ៨គ្រួសារ ក្នុង១គ្រួសារៗរួមមាន: អង្ករចំនួន ២០គីឡូក្រាម, មី ១កេស, ត្រីខ ១យួរ, ទឹកត្រី ១យួរ, ទឹកស៉ីអ៉ីវ ១យួរ, ប្រេងឆា ១ដប, ស្ករស ១គីឡូក្រាម, អំបិល ១គីឡូក្រាម, ប៊ីចេង ១គីឡូក្រាម និងថវិកាចំនួន២០,០០០រៀល។

ក្នុងឱកាសនោះ លោក ហ៊ុន ប្ញទ្ធិ អភិបាលស្រុកស្រីស្នំ មានប្រសាសន៍ថា ក្នុងនាមរដ្ឋបាលស្រុក និងក្នុងនាមប្រជាពលរដ្ឋ ក្នុងមូលដ្ឋាននេះ សូមថ្លែងអំណរគុណយ៉ាងជ្រាលជ្រៅ ចំពោះ លោក ទេព ពិទូរ្យ ប្រធានសមាគមចលនាយុវជនកម្ពុជា ១៥៧សាខាខេត្តសៀមរាប និងសហការី ដែលបាននាំយកអំណោយដ៏សប្បុរស មកឧបត្ថម្ភដល់រដ្ឋបាលស្រុកស្រីស្នំ និងបងប្អូនប្រជាពលរដ្ឋក្រីក្រចំនួន ៨គ្រួសារ នៅក្នុងស្រុកនេះ ដើម្បីជួយសម្រួលដល់ការលំបាករបស់រដ្ឋបាលស្រុក ក្នុងដំណាក់កាលប្រយុទ្ធប្រឆាំងការរីករាលដាលជំងឺកូវីដ-១៩ ដែលបច្ចុប្បន្ននេះជំងឺកូវីដ-១៩ ឆ្លងនៅមានចំនួនច្រើនជារៀងរាល់ថ្ងៃ សម្រាប់ខេត្តសៀមរាបយើង។ លោកអភិបាលស្រុក បានបន្តថាការផ្ដល់អំណោយទាំងនេះ គឺបានផ្ដល់ការលើកទឹក និងចូលរួមជាចលករ ក្នុងការទប់ស្កាត់ នៃការរីករាលដាលជំងឺកូវីដ-១៩ ផងដែរ។

លោក ទេព ពិទូរ្យ ប្រធានសមាគម មានប្រសាសន៍ថា ក្នុងបរិបទ នៃការរីករាលដាលជំងឺកូវីដ-១៩ នេះ សមាគមចាំបាច់លះបង់កំលាំងកាយកំលាំងចិត្ត និងធនធានជាសម្ភារ: និងថវិកា ដើម្បីចូលរួមជាមួយរាជរដ្ឋាភិបាល ក៏ដូចជាអាជ្ញាធរគ្រប់លំដាប់ថ្នាក់ ក្នុងការជួយសម្រួលទុក្ខលំបាករបស់អាជ្ញាធរ និងបងប្អូនប្រជាពលរដ្ឋ បានមួយចំណែកផងដែរ។ លោក ក៏បានអំពាវនាវដល់បងប្អូនប្រជាពលរដ្ឋទាំងអស់ សូមចូលរួមអនុវត្តនូវវិធានការរបស់រាជរដ្ឋាភិបាលកម្ពុជា គឺ ៣ការពារ ៣កុំ និងសេចក្តីណែនាំរបស់ក្រសួងសុខាភិបាលឲ្យបានខ្ជាប់ខ្ជួន ដើម្បីកាត់ផ្តាច់ការចម្លងមេរោគដ៏កំណាចនេះ ឲ្យផុតរលត់ពីសហគមន៍យើង៕ ដោយ៖ មន្ទីរព័ត៌មានខេត្តសៀមរាប សម្រួលផ្សាយដោយ៖ ធូ កុសល

អភិបាលរងខេត្តព្រះវិហារជំរុញឱ្យអ្នកពាក់ព័ន្ធបន្តជួយទ្រទ្រង់វិ័ស័យព្រះពុទ្ធសាសនា និងបង្កើនការទប់ស្កាត់កូវីដ១៩


ព្រះវិហារ៖ លោកស៊ូ សិរី អភិបាលរង នៃគណ:អភិបាលខេត្តព្រះវិហារបានផ្តាំផ្ញើដល់គណកម្មការអាចារ្យវត្ត យាយជី តាជី ប្រជាពុទ្ធបរិស័ទចំណុះជើងវត្ត និងមន្ត្រីកងកម្លាំងក្នុងមូលដ្ឋានទាំងអស់ ត្រូវបន្តពង្រឹង និងជួយទ្រទ្រង់លើវិស័យព្រះពុទ្ធសាសនា ដែលជាសាសនារបស់រដ្ឋ ឲ្យបានកាន់តែល្អប្រសើរឡើងដើម្បីលើកកម្ពស់វិស័យព្រះពុទ្ធសាសនា ដែលខ្មែរយើង បានគោរព ប្រតិបត្តិតាំងពីយូរលង់ណាស់មកហើយនោះ ឲ្យស្ថិតនៅក្នុងការប្រតិបត្តិ នៃប្រជាពលរដ្ឋខ្មែរគ្រប់ៗរូប ជារៀងដរាប។

លោកអភិបាលរងលើកឡើងបែបនេះ ក្នុងពិធីប្រគេនទៀនព្រះវស្សា នៅសាលាឆទានមួយ ជាប់ជើងភ្នំត្បែង ស្ថិតនៅក្នុងភូមិដំបូកខ្មៅ ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ នាថ្ងៃទី២៤ខែកក្កដាឆ្នាំ២០២១នេះ។

លោកស៊ូ សិរី បញ្ជាក់ថា ដោយមានការយកចិត្តទុកដាក់ខ្ពស់ ពីប្រមុខរាជរដ្ឋាភិបាល សម្ដេចអគ្គមហាសេនាបតីតេជោ ហ៊ុន សែន និងមានការចង្អុលបង្ហាញ ពីឯកឧត្ត្តមនាយឧត្ដមសេនីយ៍ មាស សុភា ទេស រដ្ឋមន្រ្តីទទួលបន្ទុកបេសសកម្មពិសេស និងជាប្រធាន ក្រុមការងារ រាជរដ្ឋាភិបាល ចុះជួយខេត្ដព្រះវិហារ រូបលោកផ្ទាល់ រួមទាំងថ្នាក់ដឹកនាំក្រុមការងារចុះជួយខេត្ត និងស្រុកជាច្រើនទៀត បាននាំយកគ្រឿងបរិក្ខារ ទេយ្យទាន ទេយ្យវត្ថុ និងបច្ច័យមួយចំនួន មកប្រគេនព្រះសង្ឃគង់នៅក្នុងវត្តចំនួន ១០ ក្នុងខេត្ត រួមមាន៖ ទៀនព្រះវស្សា ១០គូ អង្ករ ១០ការ៉ុង មីម៉ាម៉ា ២០កេស ទឹកត្រី ១០យួរ ទឹកស៊ីអ៊ីវ ១០យួរ ទឹកផ្លែឈើ ១០កេស ទឹកបរិសុទ្ធ ១០កេស ម៉ាស់ ១០ប្រអប់ អាល់កុល ៥០លីត្រ បេ្រងម៉ាស៊ូត ៣០០លីត្រ ដោយវត្ដនីមួយៗ ទទួលបានថវិកាចំនួន ៣០ម៉ឺនរៀលផងដែរ។ ដោយឡែក យាយជី តាជី កងកម្លាំងការពារទីតាំង និងកម្មករ សរុប ៥០នាក់ ក្នុងម្នាក់ ទទួលបាន ថវិកា ២ម៉ឺនរៀល ហើយថវិកាដែលត្រូវចំណាយក្នុងពេលនេះ សរុប ១២លាន ៥សែន ៧ម៉ឺន ៩ពាន់រៀល។

ជាមួយគ្នានោះលោក ស៊ូ សិរី ក៏បានក្រើនរំឭកដល់មន្ត្រីបរិស្ថាន និងអាជ្ញាធរមានសមត្ថកិច្ច នៅក្នុងមូលដ្ឋាន ត្រូវរួមគ្នាបង្កើនការយកចិត្តទុកដាក់ សម្អាតបរិស្ថានឲ្យបានស្អាតជានិច្ចផងដែរ។ ត្រូវរួមគ្នាថែរក្សា ការពារ និងអភិរក្ស តំបន់បេតិកភណ្ឌធម្មជាតិភ្នំត្បែង ឲ្យបានគង់វង្ស ទុកសម្រាប់កូនចៅជំនាន់ក្រោយ និងទុកជាប្រយោជន៍ជាតិ។ ទន្ទឹមនោះ ក៏មិនត្រូវភ្លេចអនុវត្តតាមវិធានការណែនាំនានា របស់ក្រសួងសុខាភិបាល និងប្រសាសន៍ណែនាំដ៏ខ្ពង់ខ្ពស់របស់ ប្រមុខរាជរដ្ឋាភិបាល នូវការអនុវត្តន៍វិធានការ ៣កុំ និង ៣ការពារ ឲ្យបានជាប់ជាប្រចាំ ដើម្បីចូលរួមបង្ការ ទប់ស្កាត់ការឆ្លងរីករាលដាល នៃជំងឺកូវីដ-១៩ ក្នុងគ្រាដែលជំងឺដ៏កាចសាហាវនេះ កំពុងឆ្លងរាលដាលចូល ក្នុងសហគមន៍ ដែលជាបន្ទុកដោះស្រាយមួយដ៏ធំ របស់រាជរដ្ឋាភិបាល និងរដ្ឋបាលខេត្តព្រះវិហារ ៕

ប្រភព៖មន្ទីរព័ត៌មានខេត្តព្រះវិហារ


រដ្ឋបាលខេត្តសៀមរាប បន្តរកឃើញករណីវិជ្ជមានកូវីដ១៩ ចំនួន ៩៩នាក់, ព្យាបាលជាសះស្បើយ ១១០នាក់ និងស្លាប់ ២នាក់

 


ខេត្តសៀមរាប: ថ្ងៃទី២៤ ខែកក្កដា ឆ្នាំ២០២១ រដ្ឋបាលខេត្តសៀមរាប នាថ្ងៃទី២៣ ខែកក្កដា ឆ្នាំ២០២១ បានចេញសេចក្តីប្រកាសព័ត៌មានដោយជម្រាបជូនដល់សាធារណជនឱ្យបានជ្រាបថា ក្នុងព្រឹត្តិការណ៍ ការឆ្លងរាលដាលជំងឺកូវីដ-១៩ ចូលក្នុងសហគមន៍២០កុម្ភ: នេះ រដ្ឋបាលខេត្ត បានរកឃើញអ្នកវិជ្ជមានជំងឺកូវីដ-១៩ ថ្មីទៀត ចំនួន ៩៩នាក់, ព្យាបាលជាសះស្បើយ ១១០នាក់ និងស្លាប់ចំនួន ២នាក់។

ក្នុងនោះ ករណីទី១ ដល់ទី៣ ជាករណីមានប្រភពចម្លងចេញពីផ្សារកំពង់ក្តី, ករណីទី៤ ដល់ទី១៧ គឺជាករណីមានប្រភពចម្លងចេញពីផ្សារលើធំថ្មី, ករណីទី១៨ គឺជាករណីមានប្រភពចម្លងចេញពីសង្កាត់ស្រង៉ែ, ករណីទី១៩ ដល់ទី២២ គឺជាករណីមានប្រភពចម្លងចេញពីផ្សារដំដែក និងករណីទី២៣ ដល់ទី៤៣ ជាករណីឆ្លងមានប្រភពចម្លងចេញពីផ្សារចារឈូក ស្រុកអង្គរជុំ។ ជាមួយនឹងនោះ ករណីទី៤៤ ដល់ទី៥១ ជាករណីមានប្រភពចម្លងចេញពីអ្នកដំណើរមកពីរាជធានីភ្នំពេញ, ខេត្តបាត់ដំបង និងខេត្តព្រះសីហនុ, ករណីទី៥២ ដល់ទី៥៤ គឺជាករណីឆ្លងបន្តពីអ្នកដំណើរមកពីរាជធានីភ្នំពេញ, ករណីទី៥៥ ដល់ទី៥៧ ជាករណីឆ្លងបន្តពីអ្នកជំងឺពលករឈ្មោះ ថាំង វណ្ណា និងករណីទី៥៨ ជាករណីឆ្លងបន្តពីសពឈ្មោះ តូច សត្យា។ ចំពោះ ករណីទី៥៩ ដល់ទី៨៧ គឺជាករណីពុំទាន់អាចសន្និដ្ឋានពីប្រភពចម្លងច្បាស់លាស់នៅឡើយ។ រីឯ ករណីទី៨៨ ដល់ទី៩៩ គឺជាប្រជាពលរដ្ឋត្រឡប់ពីប្រទេសថៃ មកដល់ខេត្តសៀមរាប ហើយជាករណីសង្ស័យត្រូវបានក្រុមគ្រូពេទ្យដាក់ឱ្យធ្វើចត្តាឡីស័ក នៅវិទ្យាល័យសម្តេចឪ។

ទន្ទឹមនឹងនោះ ក៏មានព្យាបាលជាសះស្បើយ ចំនួន ១១០នាក់ អ្នកទាំងនោះត្រូវបានក្រុមគ្រូពេទ្យអនុញ្ញាតឱ្យចាកចេញពីមន្ទីរពេទ្យបង្អែកខេត្តសៀមរាប, មណ្ឌលចត្តាឡីស័កគរុកោសល្យ និងវិក្រឹតការខេត្ត, វិទ្យាល័យអង្គរ និងវិទ្យាល័យដំដែក ត្រឡប់ទៅលំនៅឋានវិញ ដោយត្រូវបន្តការធ្វើចត្តាឡីស័ករយ:ពេល១៤ថ្ងៃទៀត។

នៅថ្ងៃនោះដែរ ក៏មានករណីស្លាប់ចំនួន ២ករណីដែរ ដូចមានរាយនាមខាងក្រោម៖ ១- ឈ្មោះ ឡឹម ព្រឿន ភេទស្រី អាយុ៦០ឆ្នាំ អាសយដ្ឋាននៅភូមិក្រសាំង សង្កាត់ជ្រាវ ក្រុងសៀមរាប ដែលវិជ្ជមានជំងឺកូវីដ-១៩ កាលពីថ្ងៃទី២០ ខែកក្កដា ឆ្នាំ២០២១ និងបានស្លាប់ កាលពីថ្ងៃទី២២ ខែកក្កដា ឆ្នាំ២០២១ វេលាម៉ោង១៩៖៤០នាទី ដោយជំងឺរលាកសួត បង្កដោយមេរោគកូវីដ-១៩។

២- ឈ្មោះ ហ៊ុយ សុធាឡៃ ភេទប្រុស អាយុ៤៧ឆ្នាំ អាសយដ្ឋាននៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដែលវិជ្ជមានជំងឺកូវីដ-១៩ កាលពីថ្ងៃទី០៩ ខែកក្កដា ឆ្នាំ២០២១ និងបានស្លាប់ កាលពីថ្ងៃទី២២ ខែកក្កដា ឆ្នាំ២០២១ វេលាម៉ោង១៦៖៥០នាទី ដោយជំងឺរលាកសួត បង្កដោយមេរោគកូវីដ-១៩។

មកទល់ពេលនេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន ៣,៦២០នាក់, បានព្យាបាលជាសះស្បើយចំនួន ១,៨៥០នាក់, ស្លាប់ ៣៧នាក់ និង១,៧៣៣នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប, មណ្ឌលចត្តាឡីស័កគរុកោសល្យ និងវិក្រឹតការខេត្ត, វិទ្យាល័យអង្គរ និងវិទ្យាល័យដំដែក។

រដ្ឋបាលខេត្តសៀមរាប បានណែនាំល់ប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានខាងលើ ត្រូវរួសរាន់ធ្វើចត្តាឡីស័ក នៅតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនេះ។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវរកមេរោគ។

រដ្ឋបាលខេត្តសៀមរាប ក៏បានអំពាវនាវដល់បងប្អូនប្រជាពលរដ្ឋទាំងអស់ ចូលរួមអនុវត្តឱ្យបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាលឱ្យបានខ្ជាប់ខ្ជួន៕

ប្រភព៖ មន្ទីរព័ត៌មានខេត្តសៀមរាប

 
គេហទំព័រ WWW.KMSTVONLINE.COM ទីស្នាក់ការកណ្តាល : លេខ៤៨អឺ០ ភូមិ៣ ផ្លូវ៣៤៨ សង្កាត់បឹងកេងកង៣ ខណ្ឌបឹងកេងកង ភ្នំពេញ ទំនាក់ទំនង Tele: 012 880 593